چھوٹے قرضیں دے ذریعے زندگیاں بدلݨ دا “اخوت” ویژن عالمی سطح تے غربت مکاوݨ سانڳے بہترین ماڈل ، غربت دے خلاف ھک طاقتور ہتھیاراے ،برطانوی اخبار

اسلام آباد۔17جنوری (اے پی پی) چھوٹے قرضیں دے ذریعے زندگیاں بدلݨ دا ڈاکٹرامجد ثاقب دا “اخوت”ویژن عالمی سطح تے غربت مکاوݨ سانڳے بہترین ماڈل، لوکاں دی قسمت بدلݨ دا ذریعہ ت غربت دے خلاف ھک طاقتور ہتھیار اے ۔ برطانوی اخبار” انڈیپنڈنٹ “آپݨے ایشیا ء ایڈیشن اچ گزریل ݙینھ ڈاکٹر امجد ثاقب دی”اخوت فائونڈیشن” دی جدوجہد کوں شاندار الفاظ اچ تعریف کریندے ہوئیں دنیا کوں بااختیار بݨاوݨ تے عالمی سطح تے غربت مکاوݨ سانڳے ڈاکٹر امجد ثاقب دے مائیکرو فنانس ویژن کوں بہترین ماڈل دے طور تے چاتے ۔ برطانوی اخبار دے آرٹیکل اچ آکھیا ڳئے جو عالمی ایوارڈ یافتہ ڈاکٹر امجد ثاقب چھوٹے پیمانے تے قرضیں دے ذریعے غریب اتے پسماندہ لوکاں دی زندگی بدلݨ اچ کلیدی کردار نبھائے ۔مضمون اچ آکھیا ڳئے جو عالمی غربت دا مقابلہ کرݨ سانڳے میدان اچ ڈاکٹر امجد ثاقب امید تے جدت دی علامت بݨ تے ابھریے ۔ انہاں اپݨے ساتھیاں نال رل تے ھک ایجھے ماڈل دی بنیاد رکھی جیں نہ صرف غریب لوکاں بلکہ انہاں دے خانداناں دی زندگی بدل ݙتی تے سماج اچ ھک نواں نظام متعارف کرائے۔ اخبار موجب مائیکرو فنانس دے شعبے اچ ڈاکٹر امجد ثاقب ھک چیمپیئن ہن تے انہاں دا متعارف کرایا ڳیا ماڈل محض ھک مالیاتی نظام ہی کائنی بلکہ سماجی تبدیلی دا ھک طاقتور ذریعہ اے۔ پروگرام دے تحت ایجھے طبقیں کوں چھوٹے پیمانے تے بلاسود چھوٹے قرضے ݙتے ڳئن جیڑھے جو روایتی بینکنگ دے نظام تئیں رسائی نی رکھیندے تے نہ ہی بینک انھاں کوں قرض ݙیندن ۔اخوت دے چھوٹے چھوٹے قرضیں توں کاروبار شروع تھئے ،پھلے پھلیے ، تعلیم جاری رکھݨ ے زندگیاں دے موقع میسر آئے ۔ایں ماڈل کوں نہ صرف ملکی سطح تے زبردست پذیرائی ملی بلکہ ہݨ پوری دنیا سانڳے ھک ماڈل دے طور تے اہمیت اختیار کرڳئے ۔ اخبار لکھدے ڈاکٹر امجد ثاقب غربت دے خلاف ساݙی جنگ لڑݨ سانڳے انسان دوستی اتے چھوٹی جیہی مالی معاونت کوں ھک طاقتور ہتھیار سمجھدن۔ او آکھدن جو ،انہاں دا مقصد سانجھے تعاون دا ھک نظام بݨیندے ہوئیں لوکاں کوں بلاسود قرضے ݙٰیندے ہوئیں بااختیار بݨاوݨاں اے ۔ اخوت دے بانی چیئرمین ڈاکٹر امجد ثاقب 2001 اچ 100 ڈالرتوں سود توں پاک مائیکرو فنانس ادارے دی بنیاد رکھی اتے ہݨ تئیں ھک ارب ڈالر روپے دے چھوٹے قرضے ݙے چکئن تے جیں توں 60 لکھ توں ودھ خانداناں دی زندگیاں بدلݨ اچ مدد ملی اے ۔اخبار ڈاکٹر امجد اتے انہاں دے ساتھیاں دے وژن کوں لوکاں کوں خود کفیل بݨیندے ہوئیں غربت دا خاتمہ یقینی بݨاوݨ سانڳے ھک کامیاب ماڈل قرار ݙتے۔اخبار لکھیے جو ٻہوں سارے ترقی پذیر ملکاں اچ آبادی دا ھک وݙا حصہ بینکاں اتے مالیاتی اداریں تئیں رسائی توں محروم اے جیں پاروں او غربت دی دلدل اچ ٹر ویندن، ڈاکٹر امجد ثاقب دا اے ماڈل انہاں لوکاں سانڳے امید دی ھک کرن اے ۔ بلاسود چھوٹے قرضے جاری تھیوݨ نال پسماندہ علاقیں دیاں تریمتاں کوں بااختیار بݨاوݨ دی ممکن اے ۔ مضمون اچ آکھیا ڳئے جو پوری دنیا اچ ایں ماڈل کوں پذیرائی ملدی پئی اے ۔ جیں دا اعتراف ڈاکٹر امجد ثاقب کوں 2021 اچ رامون میگسیسے ایوارڈ (ایشیاء دے نوبل انعام دے مساوی )، 2018 اچ اسلامی اقتصادیات ایوارڈ، 2022 اچ نوبل امن انعام سانڳے نامزدگی ، 2023 اچ گلوبل مین آف دی ڈیکیڈ ایوارڈ ، ورلڈ اکنامک فورم، شواب فاؤنڈیشن، اتے مرحوم ملکہ الزبتھ دوم دے ‘پوائنٹس آف لائٹ’ ایوارڈ زدی صورت اچ کیتا ڳئے ۔ مضمون اچ آکھیا ڳئے جو ڈاکٹر ثاقب اتے اخوت دا ماڈل غیر روائیتی اے تے اے پسماندہ طبقات کوں چاوݨ سانڳے ھک نیٹ ورک دا قیام عمل اچ گھن آندے ، افراد اتے کمیونٹیز ھک ݙوجھے دی مدد کریندے ہوئیں اڳوں ودھدن ۔مضمون اچ آکھیا ڳئے جو ڈاکٹر امجد دے مائیکرو فنانس ماڈل دی کامیابی حیران اتے متاثر کن اے تے سماج تے ایندا اثر ٻہوں گہرا اتے ݙو رس اے ۔ کامیابی دا اے ماڈل غربت دے خلاف عالمی جنگ اچ ھک طاقتور ہتھیار ثابت تھی سڳدے ۔ مضمون اچ آکھیا ڳئے جو ایندے اچ جݙاں جو دنیا معاشی عدم مساوات اتے عالمی وباواں سودھے اوکھے معاشی چیلنج نال نبڑدی پئی اے ،۔ ڈاکٹر امجد ثاقب دا اے وژن پائیدار سماجی و معاشی ترقی دی بنیاد بݨ سڳدے۔

مضمون کا ماخذ : میگا ملینز کا بونس

متعلقہ مضامین